ކުށެއްގެ ތުހުމަތުގައި ބަންދުކުރެވިފައިވާ ފަރާތްތަކުގެ ބަންދާމެދު ގޮތެއް ނިންމުމަށްޓަކައި 2026 އޮކްޓޯބަރ 01 ވަނަ ދުވަހުން ފެށިގެން ށ ޖުޑީޝަލް ދާއިރާގެ މެޖިސްޓްރޭޓް ކޯޓުތަކަށް އެފަދަ މީހުން ޙާޟިރުކުރުމަށް ހަމަޖެހިފައިވަނީ ރަސްމީ ދުވަހެއްނަމަ، އެ ދުވަހެއްގެ 12:00 އިން 14:00 އަށް ކަމަށާއި، އަދި ރަސްމީ ބަންދު ދުވަހެއްނަމަ، އެ ދުވަހެއްގެ 14:00 އިން 16:00 އަށް ކަމަށް، ގަވާއިދު ނަންބަރު: 2021-SC-REG-01 (ޝަރީޢަތް ކުރުމާބެހޭ ޖިނާއީ އިޖުރާއަތުގެ ގަވާއިދު) ގެ 6 ވަނަ މާއްދާގެ ދަށުން ށ ޖުޑީޝަލް ދާއިރާގެ މެޖިސްޓްރޭޓުންގެ އިއްތިފާޤުން ވަނީ ކަނޑައެޅިފައެވެ.

މިގޮތަށް ކަނޑައެޅުނު ނަމަވެސް، އެ ދުވަހެއްގެ ބަންދާމެދު ގޮތެއް ނިންމުމުގެ މަޖިލިސް ބޭއްވުމަށް ހަމަޖެހިފައިވާ ގަޑީގައި މަޖިލިސް ބޭއްވުމަށް ދަތިވާފަދަ ޙާލަތެއް މެދުވެރިވެއްޖެނަމަ، ބަންދާމެދު ގޮތެއް ނިންމުމުގެ މަޖިލީހަށް ޙާޟިރުކުރަންޖެހޭ ފަރާތްތައް ޙާޟިރުކުރަންޖެހޭ ގަޑިއަށް ބަދަލު ގެނައުމުގެ އިޚްތިޔާރު އެ ކޯޓެއް ހިންގުމާ ޙަވާލުވެ ހުންނެވި މެޖިސްޓްރޭޓަށް ނުވަތަ އެ ދުވަހެއްގެ ބަންދާމެދު ގޮތެއް ނިންމުމުގެ މަޖިލިސް ކުރިޔަށް ގެންދިއުމަށް ކަނޑައެޅިފައިވާ މެޖިސްޓްރޭޓަށް ލިބިގެންވެއެވެ.

ވީމާ، މިކަން އާންމުކޮށް އެންގުމަށްޓަކައި އިޢުލާންކުރީމެވެ.