މި ރަށުގެ ބައެއް ގެތަކުގެ މަގުމައްޗަށްވާގޮތަށް ދިޔަދޮވި ނާޅުވާ ހުންނަ ފުރާޅުންނާއި މަގުމައްޗަށް ވާގޮތަށް ހުންނަ ދިޔަދޮވީގެ ހޮޅިތަކުން، ވިއްސާރަ މޫސުމުގައި މަގުތަކަށް ފެންފައިބަމުންދާކަންވަނީ ފާހަގަކުރެވިފައެވެ. މިކަމުގެ ސަބަބުން މަގުތަކުގައި ފެންބޮޑުވެ، ހިނގާބިނގާވެ އުޅޭ ފަރާތްތަކަށާއި ދުއްވާ އެއްޗެއްސަށް ދަތިތަކާ ކުރިމަތިލާންޖެހުމުގެ އިތުރުން، އާންމު އިޖުތިމާޢީ ގުޅުންތަކަށް ވެސް ނޭދެވޭ އަސަރުތަކެއް ކުރެއެވެ. ވީމާ، މިފަދަ ޝަކުވާތައް މިކައުންސިލަށް ލިބެމުންދާތީ، މި މައްސަލައަށް ޙައްލެއް ހޯދުމަށް މި ކައުންސިލްގެ 19 ވަނަ އާންމު ޖަލްސާއިން ވަނީ ނިންމާފައެވެ.              

އިސްލާމްދީނަކީ އަނެކުންނަށް އުނދަގޫވާނޭ އެންމެހައި ކަންކަމުން ދުރުހެލިވުމަށް އަމުރުކުރައްވާފައިވާ މަތިވެރި ދީނެކެވެ. މަގުމައްޗަކީ އެންމެންގެ ޙައްޤެކެވެ. މަގުމަތީގެ އަދަބުތައް ބަޔާންކޮށްދެއްވަމުން ކީރިތި ރަސޫލާ ﷺ ޙަދީޘްކުރައްވާފައިވެއެވެ. "غَضُّ البَصَرِ، وَكَفُّ الأَذَى، وَرَدُّ السَّلاَمِ، وَالأَمْرُ بِالْمَعْرُوفِ، وَالنَّهْيُ عَنِ المُنْكَرِ"  މާނައީ: އެއީ ޙަރާމްކުރެވިގެންވާ ކަމަކަށް ތިމާ ނުބެލުމާއި، މީސްތަކުންގެ ކިބައިން އުނދަގޫތައް ދުރުކުރުމެވެ. އަދި ސަލާމް ރައްދުކުރުމާއި، ހެޔޮ ކަންތަކަށް އަމުރުކުރުމާއި، ނުބައިކަންތައް ނަހީކުރުމެވެ." މިހެންކަމުން، ތިމާގެ ގޭގެ ސަބަބުން މަގުމަތީގައި އުޅޭ މުސްލިމް އަޚުންނާއި އުޚުތުންނަށް އުނދަގޫ ފޯރުމަކީ އިސްލާމީ ރިވެތި އަޚްލާޤާ ޚިލާފު ކަމެކެވެ.

މީގެ އިތުރުން މިކައުންސިލުގެ ނަންބަރު:2019/R-183 (ގޭގޭ ފުރާޅުން މަގުމައްޗަށް އަންނަ ފެން ހިންދުމާބެހޭ ގަވާއިދު) ގެ 4 ވަނަ މާއްދާގެ (ހ) ގައި ބަޔާންކުރަނީ "އިމުގެ މަގުމައްޗާވީ ފަޅިން އިމާރާތްކޮށްފައި ހުންނަ ބިނާތައް މަގުމައްޗަށް ފެންފަހިވާގޮތަށް ހިޔާކުރާނަމަ، ފުރާޅުގައި ދިޔަދޮވިލައި، ހޮޅިގުޅައި، މަގުމައްޗަށް ފުރާޅުން ފެން ނުފައިބާގޮތަށް ހަދަންވާނެއެވެ." މިހެންކަމުން އާންމުންގެ މަސްލަޙަތަށް ގެއްލުންވާ ގޮތަށް ކުރެވޭ މިފަދަ ކަންކަމަކީ ޤާނޫނީގޮތުން ފިޔަވަޅު އެޅިގެންދާނެފަދަ މަނާ ކަންކަމެވެ.

ވީމާ، އެންމެހައި ލޮބުވެތި ރައްޔިތުން މިކަމަށް ޚާއްޞަ ސަމާލުކަމެއް ދެއްވައި، ގޭގޭގެ ފުރާޅުން ފައިބާ ފެން މަގުމައްޗަށް ނުފައިބާނޭހެން ގޯތިތެރެއަށް ނުވަތަ ފެން ހިންދާ ވަޅުތަކަށް އެޅޭނޭ ގޮތަށް ދިޔަދޮވިތަކާއި ހޮޅިތައް، 2026 ނޮވެންބަރު 30 ގެ ކުރިން އިޞްލާޙުކޮށްދެއްވުމަށް އިލްތިމާސްކުރަމެވެ. އެއްބަޔަކު އަނެއްބަޔަކަށް އެހީތެރިވެ، އަމާން އަދި ހިތްފަސޭހަ ވެއްޓެއް ޤާއިމުކުރުމުގައި އެންމެހައި ރައްޔިތުންގެ އެއްބާރުލުން ދެއްވުން އެދެމެވެ