ޤައުމު ބިނާ ކުރުމުގައި ޢާއިލާގެ ދުޅަހެޔޮކަން ދަމަހައްޓައި ޤައުމާއި، ރަށުގެ އަންނަން އޮތް ޖީލުތަކުގެ ދައުރު މުހިންމުކަން ޤަބޫލުކޮށް އެ ޖީލުތައް ހެޔޮގޮތުގައި ތަރުބިއްޔަތު ކުރުމަށް މަގުފަހި ކުރުމަށްޓަކައި އަދުގެ ކުޑަކުދިންގެ ޖިސްމާނީ، ނަފުސާނީ، ރޫޙާނީ، ފިކުރީ އަދި، އިޖުތިމާޢީ ދުޅަހެޔޮކަން ރައްކާތެރިކޮށް ދަމަހައްޓައި ތަރައްޤީ ކުރުމަށް ބާރު އެޅުމަކީ އަޅުގަނޑުމެން އެންމެންގެވެސް ނުހަނު މުހިންމު ފަރުދީ ބޮޑު ޒިންމާއެއް ކަމާމެދަކު އެއްވެސް ސައްކެއް ނެތެވެ. މިގޮތުން މިހާރަކަށް އައިސް ބާރަށުގައި ޢުމުރުން 18 އަހަރުން ދަށުގެ ކުދިންނާއި، ސްކޫލް ދަރިވަރުން ރަށުގެ ގޮނޑުދޮށުގައާއި، ފިނިމައިޒާންތަކާއި، ހޮޓާ، ކެފޭތަކުގައާއި، މީހުންނާ އެކަހެރި ޝަރަޙައްދުތަކުގައި ރޭގަނޑު ވަރަށް ދަންވާންދެއްވެސް އެއްވެސް ބޭނުމެއްނެތި މުޖުތަމަޢު ބަލައިނުގަނެވޭފަދަ އަޚުލާޤީ، ސްލޫކީ މިންގަނޑުތަކާ ޚިލާފަށް ބޭރުގައި އުޅޭކަން މި ކައުންސިލަށް ވަނީ ވަރަށް ބޮޑަށް ފާހަގަ ކުރެވިފައެވެ. މިފަދަ ކަންކަމަކީ އިޖުތިމާޢީ ގޮތުން އެކަމުގެ ނޭދެވޭ އަސަރުތައްކޮށް އަޚުލާޤީ އެތައް މައްސަލަތަކެއް ކުރިމަތިވާނޭ ކަންކަމަށް ވީހިނދު މިރަށުގައި ހުރި މަދަނީ ޖަމުޢިއްޔާތަކާއި، ބާރަށު ސްކޫލާއި، މިރަށުގައި ހުރި މުއައްސަސާތަކާއި އަދި، މިނޫންވެސް ޢުމުރުން 18 އަހަރުން ދަށުގެ ކުދިން ހިމަނައިގެން ކުރިއަށް ގެންދާ ޙަރަކާތްތައް ރާވާ ހިންގާ ކުޅިވަރު އެކެޑަމީތަކުންވެސް މިކަންކަމަށް ސަމާލުކަން ދެއްވުމަށް މި ކައުންސިލުން އިލްތިމާސް ކުރަމެވެ.

އަދި، މިއަދު 24 ސެޕްޓެމްބަރ 2026 ވީ ބުރާސްފަތި ދުވަހުން ފެށިގެން މުހިންމު އެއްވެސް ބޭނުމެއްނެތި ޢުމުރުން 18 އަހަރުން ދަށުގެ ކުދިންނާއި، ސްކޫލް ކުދިން ރޭގަނޑު 9:00 ގެ ފަހުން ބެލެނިވެރި ފަރާތެއް، ނުވަތަ އެކުއްޖެއްގެ ބަލަދުވެރި ފަރާތަކާއެކު ނޫނީ ރަށުތެރޭގައި ޙަރަކާތްތެރިވެ އުޅުމަކީ މަނާ ކަމެކެވެ.

އަދިހަމަ މިއާއެކު މިކަންކަމާ ގުޅުންހުރި މުއައްސަސާތަކަށާއި، ރައްޔިތުންނާއި، ބެލެނިވެރިންގެ ސަމާލު ކަމަށްޓަކައި އަންގާ މިކަން މި ކައުންސިލުން ފާސްކޮށް، ޢާންމުކޮށް އަންގާ އިޢުލާން ކުރަމެވެ.

24 ސެޕްޓެމްބަރ 2026