ދިރިއުޅުމަށް ދޫކޮށްފައިވާ ބިމުގައި، ބިމުގެ  އިމުންބޭރުގައި އޮޅިގަނޑު، ސިމެންތި އަށި، ޕޭމަންޓް ގައު ބަހައްޓައި ތަންތަން ހަދާފައިވާކަމާ،  ފުރާޅުން މަގުމައްޗަށް ފެންފައިބާ ގޮތަށް ހިޔާކުރުމާއި ފުރާޅުގެ ދިޔަދޮވި ހޮޅިތައް މަގުމައްޗަށް ފެންދާ ގޮތަށް ހަދާފައިވާކަންމި ކައުންސިލަށް ވަނީ ފާހަގަ ކުރެވިފައި ވެއެވެ.

މި ރަށުގައި އިމާރާތް ކުރުމުގައި އަމަލު ކުރަނީ ގަވާއިދު ނަންބަރު: " 1002-އާރ/2019 (ޕްލޭނިންގ ގަވާއިދެއް ނެތް ރަށްރަށް ނުވަތަ ފަޅުފަޅުގައި ޢިމާރާތް ކުރަންވީގޮތުގެ ގަވާއިދު"ގެ ދަށުންނެވެ.

މި ގަވާއިދުގެ 16 ވަނަ މާއްދާގައި ބަޔާންކޮށްފައިވާ ގޮތަށް އިމާރާތުގެ ބައެއް މަގަށް ނެރެވޭނީ އަންނަނިވި ޙާލަތުގައި އެކަންޏެވެ.

• އިމުގެ މަގުމައްޗާވީ ފަޅީގެ މަގު 6 ފޫޓަށްވުރެ ހަނި ނަމަ އިމުން ބޭރަށް  ޢިމާރާތުގެ 9 (ނުވައެއް) ފޫޓަށް ވުރެ މަތިން އިމާރާތުގެ ފުރާޅުގެ އަސްކަންޏާއި ދިޔަދޮވި އިމުން ފެށިގެން  0.656 (ސުމެއް ޕޮއިންޓް ހައެއް ފަހެއް ހައެއް ) ފޫޓަށް މަގަން ނެރެވިދާނެއެވެ.
• އިމުގެ މަގުމައްޗާވީ ފަޅީގެ މަގު 6 ފޫޓަށްވުރެ ފުޅާ ނަމަ އިމުން ބޭރަށް  ޢިމާރާތުގެ 9 (ނުވައެއް) ފޫޓަށް ވުރެ މަތިން އިމާރާތުގެ ފުރާޅުގެ އަސްކަންޏާއި ދިޔަދޮވި އިމުން ފެށިގެން  1.499 (އެކެއް ޕޮއިންޓް ހަތަރެއް ނުވައެ ނުވައެއް) ފޫޓަށް މަގަން ނެރެވިދާނެއެވެ.

 މިޤަވާއިދާ ހިލާފަ އިމުންބޭރުގައި ތަންތަން ހެދުމަކީ މަނާކަމެކެވެ.

އަދި ގަވާއިދު ނަންބަރު: 2013/R-1693 (ގޭގޭ ފުރާޅުން މަގުމައްޗަށް އަންނަ ފެން ހިންދުމާބެހޭ ޤަވާޢިދު – ތ.ބުރުނި)

•  4 ވަނަ މާއްދާގެ (ހ) ގައި އިމުގެ މަގުމައްޗާވީ ފަޅީގައި ޢިމާރާތްކޮށްފައި ހުންނަ ބިނާތައް މަގުމައްޗަށް ފެންފައިބާ ގޮތަށް ހިޔާކުރާނަމަ ފުރާޅުގައި ދިޔަދޮވި ލައި ހޮޅި ގުޅައި މަގުމައްޗަށް ފުރާޅުން ފެން ނުފައިބާ ގޮތަށް ހަދަންވާނެ ކަމަށާއި، ދިޔަދޮވިން މަގުމައްޗަށް ފެން ފައިބާ ގޮތަށް ހުރެގެން ނުވާނެކަމަށް ބަޔާންކޮށްފައި ވެއެވެ.
• އަދި މި ގަވާއިދުގެ 5 ވަނަ މާއްދާގައި ޢިމާރާތުގެ ޓެރަސް، ބެލްކަނި ފަދަ ތަންތަނަށް ޖަމާވާ ފެނާއި އެއަރކޯނު ފަދަ ތަކެތިން މަގުމައްޗަށް ފެން ފައިބާ ގޮތަށް ނުވަތަ މަގު މައްޗަށް ފެން އޮހޭ ގޮތަށް ބެހެއްޓުމަކީ މަނާކަމެއް ކަމަށް ބަޔާންކޮށްފައި ވެއެވެ. މިފަދަ ގޮތަކަށް ހުރިތަންތަން މަގުމައްޗަށް ފެން ނުފައިބާ ގޮތަށް ހޮޅިލައި އެހޮޅިން ފައިބައި ފެން ބިމަށް ހިނދޭގޮތަށް ހަދަންވާނެކަމަށް ބަޔާންކޮށްފައި ވެއެވެ.

ވީމާ، 02 ޖަނަވަރީ 2027 ގެ ކުރިން ގަވާއިދާ ޚިލާފަށް އިމުންބޭރުގައި ހަދާފައިވާ ތަންތަނާއި މަގުމައްޗަށް ފެން އޮހޭ ގޮތަށް ހުރި ފުރާޅުތަކާއި ދިޔަދޮވި، އަދި ހޮޅިތައް، މަގުމައްޗަށް ފެން ނުފައިބާ ގޮތަށް ގޯތިތެރެއަށް ބަދަލުކުރުމާއި، ދިޔަދޮވި ނުވަތަ ދިޔަދޮވި ހޮޅި މަގުމައްޗަށް ފެންދާ ގޮތަށް ހުރި ތަންތަނުގެ ހޮޅިތައް ގޯތިތެރެއަށް ބަދަލުކުރުމަށް އަންގަމެވެ.

މިހެންވެ، މިކަން އާންމުކޮށް އެންގުމަށްޓަކައި އިއުލާން ކުރީމެވެ.