ދިވެހިރާއްޖެ
އެން ސްކިލްސް އެންޑް ޓްރެއިނިންގ ގެ ފަރާތުން ސްކޫލްތަކުގެ ދަރިވަރުންނަށާއި، ބެލެނިވެރިން އަދި ވަޒީފާ އަދާކުރާ ފަރާތްތަކަށް ޚާއްސަ ކުރެވިގެން ލައިފް ކޯޗިންގ ސެޝަންސް ނަގައި ދިނުމަށް ހަމަޖެހިފައިވާކަމަށް، މިކައުންސިލްގައި ވަނީ ދަންނަވާފައެވެ. މިސެޝަންތައް ކުރިއަށް ގެންދިއުމަށް ހަމަޖެހިފައިވަނީ އެއްވެސް ފީ އެއް ނެގުމެއްނެތި ދަރިވަރުންނާއި، ބެލެނިވެރިން އަދި މުވައްޒަފުންނަށް ހިލޭ ދެވޭ ޚިދުމަތެއްގެ ގޮތުގައެވެ. މިގޮތުން މިކަމާއި ގުޅޭ އިތުރު މައުލޫމާތު ތިރީގައި މިދަންނަވަނީއެވެ.
1. ދަރިވަރުންނަށް ނެގިދާނެ ސެޝަންތައް:
- ކިޔެވުމުގެ މަތިން ފޫހިވާތީ އަލުން ޝައުގުވެރިކަމާއެކީ ކިޔެވުން ފެށުމަށް ކުރެވިދާނެ ކަންކަމާއި ގުޅޭ ގޮތުން.
- ސްކޫލަށް ދާހިތް ނުވާތީ އަލުން ސްކޫލަށް ދާން ހިތް ޖެއްސެމަށް ކުރެވިދާނެ ކަންކަމާއި ގުޅޭ ގޮތުން.
- ގަޑި ޖެހިގެން ސްކޫލަށް ދިއުން އިތުރުވާތީ ގަޑި ނުޖެހި ސްކޫލަށް ދާނެ ގޮތްތަކާއި ގުޅޭ ގޮތުން.
- ސްކޫލް ނިމިގެން ކުރިއަށްދާނެ ގޮތް އިޚްތިޔާރު ކުރަން ދަތިވެފައިހުރުން.
- އަމިއްލަ ނަފްސަށް އުނދަގޫވާ ކަމެއް ދިމާވާތީ އެކަމުން އަރައިގަތުމާއި ގުޅޭ ގޮތުން.
- އަމިއްލަ ނަފްސަށް އޮންނަ އިތުބާރު ކުޑަވާން ފެށުމުން ނަފްސަށް ކުރާ އިތުބާރު އަލުން އިއާދަ ކުރުމާއި ގުޅޭ ގޮތުން.
- އިމްތިހާންތަކުން ފެއިލްވާތީ ކުރިއަށް ދިއުމަށް އުނދަގޫވާތީ އެކަމަށް ކުރެވިދާނެ ކަންކަމާއި ގުޅޭ ގޮތުން.
2. ބެލެނިވެރިންނާއި މުވައްޒަފުންނަށް ނެގިދާނެ ސެޝަންތައް:
- ދަރިންނަށް އެކަށޭނެ ވަގުތު ނުދެވޭތީ އެކަން ރަނގަޅު ކުރުމަށް ކުރެވިދާނެ ކަންކަމާއި ގުޅޭ ގޮތުން.
- ދަރިންގެ އިމްތިހާނުގެ ނަތީޖާ ދައްވަމުންދާތީ އެކަމާ ހާސްވެ ފިކުރުބޮޑުވާތީ ކުރެވިދާނެ ކަންކަމާއި ގުޅޭގޮތުން.
- ދިރިއުޅުމުގައި ހުރި ގޮންޖެހުން ތަކުން އަރައިގަތުމަށްޓަކައި ކުރެވިދާނެ ކަންކަމާއި ގުޅޭ ގޮތުން.
- އާއިލީ ގުޅުން ހީނަރުވެފައި ވާތީ އެކަން ޙައްލު ކުރުމަށް ކުރެވިދާނެ ކަންކަމާއި ގުޅޭ ގޮތުން.
- ވަޒީފާގެ މާހައުލުގައި ދިމާވާ އެކިއެކި މައްސަލަތަކަށް ހައްލު ހޯދުމާއި ގުޅޭގޮތުން.
- ދިރިއުޅުމުގެ ހަރަދުތައް އިތުރުވާތީ އެކަމުންދިމާވާ އެކިއެކި މައްސަލަތަކާއި ގުޅޭ ގޮތުން.
- ދަރިންނަށް ދިމާވާ މައްސަލަތަކާއި ގުޅިގެން އަމިއްލަ ދިރިއުޅުމަށް ކުރާ އަސަރުތަކުން އަރައިގަތުމާއި ގުޅޭގޮތުން.
ވީމާ، ސްކޫލް ދަރިވަރަކަށް، މުވައްޒަފަކަށް ނުވަތަ ބެލެނިވެރިއަކަށް މިފަދަ ކަމަކާއި ގުޅޭ ގޮތުން ހިލޭ ކޯޗިންގ ސެޝަންއެއް ނަންގަވަން ބޭނުންފުޅުވާނަމަ ތިރީގައިވާ ދެ ގޫގުލް ފޯމުގެ ތެރެއިން ކޮންމެވެސް އެއް ފޯމެއް ފުރުމަށްފަހު ސަބްމިޓް ކުރެއްވުން އެދެމެވެ.
މި ކޯޗިންގ ސެޝަންތައް ނަންގަވައި ދެއްވާނީ އެކަމަށް ސެޓިފައިވެފައިވާ ލައިފް ކޯޗުން ކަމުގައިވެސް ދެންނެވީމެވެ.