ދިވެހިރާއްޖެ
"ބޯހިޔާވަހިކަން އެންމެނަށް" ސްކީމުގެ ދަށުން ދޫކުރާ ބިން/ފްލެޓަށް ކުރިމަތިލުމަށްޓަކައި އެފަރާތަކީ މާލޭގައި ދިރިއުޅޭ ފަރާތެއްކަން އަންގައިދޭ ލިޔުން ހޯދުމަށް އެކި ފަރާތްތަކުން މި ކައުންސިލަށް އެދެމުންދާތީ ދަންނަވަމެވެ.
ބިމާއި ފްލެޓަށް އެދި ހުށަހަޅާ ފަރާތްތަކުން މާލޭގައި ދިރިއުޅުނު މުއްދަތު ސާބިތުކޮށްދިނުމަށް ހުށަހެޅިދާނެ ލިޔެކިޔުންތަކުގެ ތެރޭގައި، ދައުލަތުގެ އިދާރާއަކުން ރަސްމީކޮށް ބަލަހައްޓާ ލިޔެކިޔުންތަކާއި މަޢުލޫމާތުތަކުން މާލޭގައި ދިރިއުޅުނުކަން ސާބިތުވާނަމަ، އެއިދާރާއަކުން ދީފައިވާ ލިޔުން ހުށަހެޅިދާނެކަމާއި އެހެންނަމަވެސް، އިދާރާއަކުން ދޫކުރާ ލިޔުން ބަލައިގަނެވޭނީ އެ އިދާރާއަކުން ރަސްމީކޮށް ބަލަހައްޓާ މަޢުލޫމާތުން، މާލޭގައި އުޅެފައިވާ މުއްދަތު ސާބިތުވާނަމަކަމަށާއި، ރަށު ކައުންސިލަކުން ނުވަތަ ސިޓީ ކައުންސިލަކުން މާލޭގައި ދިރިއުޅެފައިވާ މުއްދަތު ބަޔާންކޮށް ދޫކުރާ ލިޔުމަކީ އެކައުންސިލެއްގައި ބަލަހައްޓާ މަޢުލޫމާތުގެ މައްޗަށް ބިނާކޮށް ސާބިތުކޮށް ނުދެވޭ ލިޔުމަކަށްވާނަމަ، އެލިޔުމަކީ ބަލައިގަނެވޭނެ ލިޔުމެއް ނޫންކަމަށް މިނިސްޓްރީ އޮފް ކޮންސްޓްރަކްޝަން، ހައުސިންގް އެންޑް އިންފްރާސްޓްރަކްޝަރ އިން ޢާއްމުކޮށްފައިވާ މަޢުލޫމާތުގައި ބަޔާންކޮށްފައިވެއެވެ.
މިނިސްޓްރީ އޮފް ކޮންސްޓްރަކްޝަން، ހައުސިންގ އެންޑް އިންފްރާސްޓްރަކްޗަރގެ ނަމްބަރު 36-G/2025 އަދި 37-G/2025 އުސޫލުގެ ދަށުން އެޕްލިކޭޝަން މަރުހަލާގައި ހުށަހަޅަން ޖެހޭ ލިޔެކިޔުންތަކުގެ ތެރޭގައި ޖަދުވަލު 2 ގެ 3.4 ގައި ވާ ގޮތަށް ދަޢުލަތުގެ އިދާރާއަކުން (އެ އިދާރާއަކުން ރަސްމީކޮށް ބަލަހައްޓާ ލިޔެކިޔުންތަކާއި މަޢުލޫމާތުން، މާލޭގައި ދިރިއުޅެފައިވާ މުއްދަތު ސާބިތުވާކަމުގެ ލިޔުމެއް) ހުށަހެޅޭނެ ކަމަށް އޮތް ނަމަވެސް ވެލިދޫގައި ރަށްވެހިފައިވާ މާލޭގައި ދިރިއުޅޭ ފަރާތްތަކުގެ ރެކޯޑްތައް، ދިރިއުޅުން ބަދަލުކުރި އަހަރާއި އެކު މިކައުންސިލުން ރަސްމީ ސިފައެއްގައި ކުރިން ބަލަހައްޓާފައިނުވާތީ، އެފަރާތްތަކުން މާލޭގައި ދިރިއުޅެފައިވާ މުއްދަތު ކަށަވަރުކޮށްދީ އެފަދަ އެއްވެސް ލިޔުމެއް ކައުންސިލުން ދޫކުރެވޭނީ މާލޭގައި ނުވަތަ ރަށުން ބޭރުގައި ދިރިއުޅުނު މުއްދަތު ކައުންސިލަށް ކަށަވަރުކޮށްދިނުމަށް ލިޔެކިޔުންތައް ހުށަހެޅުމުން، ހުށަހަޅާ ލިޔެކިޔުންތަކުގެ އަހަރުތަކަށް ބެލުމަށްފަހު ހަމަ އެކަނި އެ އަހަރުތަކަށްކަމުގައި ދަންނަވަމެވެ.
ވީމާ، މިކަން ޢާންމުކޮށް އަންގައި އިޢުލާންކުރީމެވެ.