އިޢުލާން

ސަރުކާރުގެ ބޯހިޔާވަހިކަމުގެ ބޭނުމަށް، މާލޭގައި ދިއުޅޭކަމުގެ ލިޔުން ހޯދުމަށް ހުށަހަޅާ ހުށަހެޅުންތަކާ ގުޅޭ!           

               ސަރުކާރުގެ ބޯހިޔާވަހިކަމުގެ ސިޔާސަތުގެ ދަށުން ދޫކުރާ ބިން/ފުލެޓަށް ކުރިމަތިލުމަށްޓަކައި އެފަރާތަކީ މާލޭގައި ދިރިއުޅޭ ފަރާތެއްކަން އަންގައިދޭ ލިޔުން ހޯދުމަށް އެކި ފަރާތްތަކުން ކައުންސިލްތަކަށް ހުށަހަޅަމުން ގެންދާތީ ލޯކަލް ގަވަރމަންޓް އޮތޯރިޓީގެ ނަންބަރު: 221-CCS/2026/5 (22 ޖަނަވަރީ 2026) ސިޓީއިން ކައުންސިލްތަކަށް އަންގަވާފައިވާތީ ދަންނަވަމެވެ. މިގޮތުން ރަށު ކައުންސިލަކުން މާލޭގައި ދިރިއުޅެފައިވާ މުއްދަތު ބަޔާންކޮށް ދޫކުރާ ލިޔުމަކީ އެކައުންސިލެއްގައި ބަލަހައްޓާ މަޢުލޫމާތުގެ މައްޗަށް ބިނާކޮށް ދޫކުރެވޭ ލިޔުމަކަށް ވާންޖެހޭނެކަމަށް އަންގާފައިވެއެވެ.

               ވީމާ، މިފަދަ ލިޔުމެއް ކައުންސިލުން ހޯދުމަށްއެދި ހުށަހަޅާނަމަ، އެފަރާތަކީ މާލޭގައި ދިރިއުޅޭ ފަރާތެއްކަން އަންގައިދޭ ސަރުކާރުގެ ރަސްމީ އިދާރާއަކުން ނުވަތަ ކުންފުންޏަކުން ދޫކޮށްފައިވާ އަދި މުއްދަތު ބަޔާންކޮށްފައިވާ ލިޔުން ސިޓީއާއިއެކު ހުށަހެޅުމަށް ދަންނަވަމެވެ. މިފަދަ ލިޔުންތަކުގެ ގޮތުގައި ބަލައިގަނެވޭނީ ވަޒީފާ އަދާކުރާކަމުގެ ލިޔުން، ސްކޫލް ލީވިންގ ސެޓްފިކެޓްފަދަ ކައުންސިލަށް ޤަބޫލުކުރެވޭފަދަ ލިޔުންތަކެވެ. މިގޮތަށް ހުށަހަޅަމުން ގެންދާ ފަރާތްތައް މިކައުންސިލުން ވަކި ދަފްތަރެއްގައި ރިކޯޑު ކުރުމަށްފަހު، ހުށަހަޅާ ލިޔުންތަކުން އޭނާ ދިރިއުޅޭތަން ކައުންސިލަށް ޔަޤީން ކުރެވޭ ކަމުގައިވާނަމަ އެފަދަ ލިޔުންތައް ދޫކުރަމުން ގެންދާނެ ވާހަކަ ދަންނަވަމެވެ. އަދި ހުށަހަޅާ ލިޔުންތަކުން، އެމީހަކު މާލޭގައި ދިރިއުޅޭކަން ކައުންސިލަށް ޔަޤީން ނުކުރެވޭނަމަ އެފަދަ ލިޔުމެއް ދޫކުރެވެން ނެތް ކަމުގައި ދަންނަވަމެވެ.

               ވީމާ، މިކަން ޢާންމުކޮށް އެންގުމަށްޓަކައި އިޢުލާން ކުރީމެވެ.