މި މިނިސްޓްރީގެ ނަންބަރު (IUL)472/472/2024/74 (26 އޮގަސްޓް 2024) ގެ އިޢުލާނާއި ހަވާލާދީ ދަންނަވަމެވެ.

އެއްގަމު ދަތުރުފަތުރުގެ ގާނޫނުގައި ބަޔާންކޮށްފައިވާ ގޮތުގެ މަތީން ރަޖިސްޓްރީނުކޮށް ބަންޑާރަ މަގުތަކުގައި ދުއްވާ އަދި ޕާކްކުރާ ވެހިކަލްތަކާއި، އެހެން ޒޯންތަކަށް ރަޖިސްޓްރީކުރުމަށްފަހު މާލޭ ސަރަހައްދުގައި ދުއްވާ ވެހިކަލްތައް ގަވާއިދާ އެއްގޮތަށް މާލޭ ޒޯނަށް ރަޖިސްޓްރީ ބަދަލުކުރުމަށް ނުވަތަ ރަޖިސްޓްރީކޮށްފައިވާ ޒޯނަކަށް ގެންދިއުމަށް، ވަގުތު ދިނުމުގެ ގޮތުން ހުޅުމާލޭގެ (ފޭސް 2) ލޮޓް ނަންބަރު 452 ބިން، މިފަދަ އުޅަނދުތައް ވަގުތީގޮތުން ބަހައްޓާނެ ތަނެއްގެ ގޮތުގައި ހަމަޖައްސައި ދީފައި ވެއެވެ.

ގާނޫނީގޮތުން ރަޖިސްޓްރީކުރުމުގެ މަރުހަލާ ފުރިހަމަކުރުމަށް މި ވެހިކަލްތަކުގެ ވެރިފަރާތްތަކަށް، 2024 ވަނަ އަހަރުގެ އޮގަސްޓް މަހުން ފެށިގެން މިއަދާ ހަމަޔަށް ފުރުޞަތު ދެވިފައިވެއެވެ. މިގޮތުން ދެވުނު ފުރުޞަތުގެ ބޭނުން ހިފައި ގިނަ ފަރާތްތަކަކުން ގަވާއިދާ އެއްގޮތަށް އުޅަނދުތައް ރަޖިސްޓްރީކުރުމާއި، އެ ވެހިކަލެއް ރަޖިސްޓްރީކޮށްފައިވާ ޒޯނަކަށް ގެންދިއުމުގެ ކަންކަން ފުރިހަމަކޮށްފައިވާކަން ފާހަގަކުރަމެވެ.

ނަމަވެސް، ގަވާއިދާ އެއްގޮތަށް ރަޖިސްޓްރީކޮށްފައިނުވާ އަދި ޒޯނު ބަދަލުނުކުރާ ބައެއް ވެހިކަލްތައް އަދިވެސް ވަގުތީގޮތުން ހަމަޖެއްސި ބިމުގައި ބަހައްޓާފައި އެބަހުއްޓެވެ.

ވީމާ، ހުޅުމާލޭގެ ލޮޓް ނަންބަރު 452 ބިމާއި، އަދި ވަގުތީ ޕާކިންގ ގެ ގޮތުގައި ހުޅުމާލެ އިން ކަނޑައަޅާފައިވާ އެހެން ބިންތަކުގައި މިހާރު ބަހައްޓާފައިހުރި ވެހިކަލްތަކުގެ ތެރެއިން، ރަޖިސްޓްރީނުކޮށް ބަންޑާރަ މަގުތަކުގައި ދުއްވާ އަދި ޕާކްކުރާ ވެހިކަލްތަކާއި، އެހެން ޒޯންތަކަށް ރަޖިސްޓްރީކުރުމަށްފަހު މާލޭ ސަރަހައްދުގައި ދުއްވާ ވެހިކަލްތައް 30 ދުވަހުގެ ތެރޭގައި އެތަނުން ނެގުމަށް އަންގާ އިޢުލާން ކުރީމެވެ. އަދި މި މުއްދަތުގައި ނުނަގާ ވެހިކަލްތައް، ގާނޫނު ނަންބަރު 2009/5 (އެއްގަމު ދަތުރުފަތުރުގެ ގާނޫނު) އާއި އެ ގާނޫނުގެ ދަށުން އެކުލަވާލާފައިވާ ގަވާއިދުތަކުގައި ބަޔާންކޮށްފައިވާ ގޮތުގެ މަތީން ނަގައި ނައްތާލުމަށް ކުރަންޖެހޭ އެންމެހާ ކަންކަން ކަމާބެހޭ ފަރާތްތަކުން ކުރިއަށް ގެންދާނެކަން ވެސް އަންގަމެވެ.