އެޓޯލް ނެވިގޭޝަން ސަރވިސަސް ޕްރައިވެޓް ލިމިޓެޑްގެ އޭޖެންޓް ކަމުގެ ދަށުން ދިވެހިރާއްޖެ އައިސްފައިވާ  ރިޕަބްލިކް އޮފް ނިޔޫގައި ރަޖިސްޓަރކޮށްފައިވާ "ޝްވޭ ލިން ޔޯން" (އައި އެމް އޯ: 9750488) ނަމަކަށް ކިޔާ ޓަގު، ށ. މިލަންދޫގެ ފަރަށް 03 އޮކްޓޫބަރު 2024 ގައި ވަނީ އުރިފައެވެ. އަދި، މި އުޅަނދު 19 އޮކްޓޫބަރު 2024 ގައި ފަރުމަތިން ފުންކޮށް ނަގާފައިވާތީ، ފަރަށް ލިބުނު ގެއްލުންތައް ބެލުމުގެ ގޮތުން 07 އަދި 08 ނޮވެންބަރު 2024 ގައި އެ އުޅަނދުގެ ވެރިފަރާތުން އައްޔަންކުރި ސަރވެޔަރުންނާއެކު އެ އުޅަނދު ފަރަށް އެރި ސަރަޙައްދުގައި ޖޮއިންޓް ސަރވޭއެއް ވަނީ ކުރެވިފައެވެ.

މިގޮތުން، މި އުޅަނދު ފަރަށް އެރި ސަރަޙައްދު ބެލި ބެލުމުން އެ ފަރުގެ 477 އަކަމީޓަރުގެ ސަރަޙައްދަކަށް ބޮޑެތި ގެއްލުންތަކެއް ލިބި، ހަލާކުވެފައިވާކަން ވަނީ ފާހަގަކުރެވިފައެވެ.

މިހެންކަމުން، އެ ފަރުގެ މާހައުލަށް ލިބުނު ގެއްލުންތަކަށް ޤާނޫނު ނަންބަރު: 4/93 (ދިވެހިރާއްޖޭގެ ތިމާވެށި ރައްކާތެރިކޮށް ދެމެހެއްޓުމާބެހޭ ޤާނޫނު) ގެ ދަށުން އެކުލަވާލެވިފައިވާ ޤަވާޢިދު ނަންބަރު: 2011/R-9 (ތިމާވެށްޓަށް ދޭ ގެއްލުންތަކަށް ޖޫރިމަނާ ކަނޑައެޅުމާއި ބަދަލުހޯދުމުގެ ޤަވާޢިދު) ގެ ދަށުން ކަނޑައެޅިފައިވާ ޖޫރިމަނާގެ ޢަދަދަކީ 12,006,200.00ރ (ބާރަމިލިއަން ހަހާސް ދުއިސައްތަ ދިވެހި ރުފިޔާ) އެވެ. އަދި ބަޔާންކުރެވުނު އުޅަނދުގެ ވެރިފަރާތް ކަމުގައިވާ ސިންގަޕޫރުގެ ކުންފުންޏެއް ކަމަށްވާ ގްލޯހާ މެރިޓައިމް ޕްރައިވެޓް ލިމިޓެޑަށް ވަނީ 12,006,200.00ރ (ބާރަމިލިއަން ހަހާސް ދުއިސައްތަ ދިވެހި ރުފިޔާ) އިން ޖޫރިމަނާ ކުރެވިފައިވާކަން އަންގައި، 30 ދުވަހުގެ ތެރޭގައި އެ ޖޫރިމަނާގެ ފައިސާ މި އޮތޯރިޓީއަށް ދެއްކުމަށް 19 ނޮވެންބަރު 2025 ވަނަ ދުވަހު  އަންގާފައިވާނެއެވެ.