ތުރުކިޔޭގެ އިސްތަންބޫލުގައި 25 އިން 28 ނޮވެމްބަރ 2026 އަށް ބޭއްވުމަށް ހަމަޖެހިފައިވާ 11 ވަނަ އޯގަނައިޒޭޝަން އޮފް އިސްލާމިކް ކޯޕަރޭޝަން (އޯއައިސީ) ހަލާލް އެގްޒިބިޝަން އަދި 12 ވަނަ ވޯރލްޑް ހަލާލް ސަމިޓް ގައި ބައިވެރިވުމުގެ ފުރުސަތު ދިވެހިރާއްޖެ އަށް ހުޅުވާލެވިފައިވާ ކަމުގެ މައުލޫމާތު ތުރުކިޔޭގެ ސަރުކާރުން ވަނީ މި މިނިސްޓްރީ އާއި ހިއްސާކުރައްވާފައެވެ.  މި މަޢުރަޒުގައި ރާއްޖޭގެ ކުންފުނިތަކާއި މި ދާއިރާގައި ހަރަކާތްތެރިވާ ފަރާތްތަކުން ބައިވެރިވުމަށް، މި މައުރަޒު އިންތިޒާމު ކުރައްވާ ފަރާތުން ވަނީ ދަޢުވަތު ދެއްވާފައެވެ.

  މި މަޢުރަޒު އަދި ސަމިޓްގެ މަޤްސަދަކީ، އޯއައިސީ މެމްބަރު ޤައުމުތަކާއި އެހެނިހެން ޤައުމުތަކާއި ދެމެދު ހަލާލް ވިޔަފާރި އިތުރަށް ކުރިއެރުވުމާއި، ހަލާލް އިންޑަސްޓްރީގައި ހަރަކާތްތެރިވާ ފަރާތްތައް، ވިޔަފާރިވެރިން، އިންވެސްޓަރުން، ސަރުކާރު އަދި އަމިއްލަ ފަރާތްތަކަށް ވިޔަފާރި ޕްލެޓްފޯމެއް ފޯރުކޮށްދިނުމެވެ. މީގެ އިތުރުން، ހަލާލް ކާބޯތަކެތި، ކޮސްމެޓިކްސް، ފައިނޭންސް، ފެޝަން، ޓޫރިޒަމް، ހެލްތްކެއާރ ފަދަ ސިނާއަތްތަކުގެ އާ އުފެއްދުންތައް ދައްކާލުން ހިމެނެއެވެ. މީގެ އިތުރުން މި މައުރަޒުގެ ސަބަބުން އިންވެސްޓްމަންޓް، އެކްސްޕޯޓް އަދި އިޤްތިޞާދީ ކުރިއެރުން އިތުރުކޮށް، މި ސިނާއަތުގެ މުހިންމު މައުޟޫތަކާ ގުޅޭގޮތުން ކޮންފަރެންސް، ޕެނަލް ޑިސްކަޝަން އަދި މަޢުލޫމާތު ބަދަލުކުރުމުގެ ފުރުސަތު ފޯރުކޮށްދިނުމަށް ހަމަޖެހިފައިވެއެވެ.

  މި މަޢުރަޒު އަދި ސަމިޓް ގައި ބައިވެރިވުމަށް ޝައުގުވެރިވާ ފަރާތްތަކުން، މައުރަޒުގެ ރަސްމީ ވެބްސައިޓް (www.helalexpo.com.tr/en/become-an-exhibitor/) މެދުވެރިކޮށް އޮންލައިން އެޕްލިކޭޝަން ފުރިހަމަކުރެއްވުމަށްފަހު، މި މައުލޫމާތު [email protected] އަށް އީމެއިލް ކޮށްދެއްވުން އެދެމެވެ. އަދި، މި މައުރަޒާ ގުޅޭ އިތުރު މައުލޫމާތު ހޯއްދެވުމަށް މައުރަޒުގެ ރަސްމީ ވެބްސައިޓް ( www.helalexpo.com.tr) މެދުވެރިކޮށް ލިބޭނެ ވާހަކަ ދަންނަވަމެވެ.