މި ރަށުގެ ގުދުރަތީ ތިމާވެށި ރައްކާތެރިކޮށް ކުރިމަގުގެ ޖީލުތަކަށް ފޯރުކޮށްދިނުމަކީ އަޅުގަނޑުމެން އެންމެންގެ ބޮލުގައި އެޅިފައިވާ ގައުމީ އަދި ފަރުދީ ޒިންމާއެކެވެ. ނަމަވެސް، ފަހަކަށް އައިސް ރަށުގެ އަތިރިމަތިން ކަށިވެލި ނެގުމާއި، ރަށާ ކައިރީގައިވާ ފަޅުރަށްތަކުން ކަޅުވެލި ނަގަމުންދާކަން މި ކައުންސިލަށް ވަނީ ފާހަގަކުރެވިފައެވެ.

ރަށުގެ ގޮނޑުދޮށުން ކަށިވެލި ނެގުމާއި ފަޅުރަށްތަކުން ކަޅުވެލި ނެގުމުގެ ސަބަބުން އަޅުގަނޑުމެންގެ ނާޒުކު ތިމާވެށްޓަށް އިއާދަނުކުރެވޭ ފަދަ ބޮޑެތި ގެއްލުންތައް ލިބެމުންދެއެވެ. އެގޮތުން ރަށުގެ ގޮނޑުދޮށް ނުވަތަ ރަންމަތި ގިރުމާއި، އުދައެރުން ފަދަ ތިމާވެށީގެ ނުރައްކާތަކަށް ރަށް ހުށަހެޅިގެންދާކަން ފާހަގަކުރަމެވެ. މިއީ ތިމާވެށީގެ ގޮތުން ލިބޭ ބޮޑެތި ގެއްލުންތަކަކަށް ވާތީ، ތިމާވެށި ރައްކާތެރިކުރުމުގެ ގާނޫނުތަކާއި ގަވާއިދުތަކުންވެސް މިފަދަ އަމަލުތަކަކީ މަނާކޮށްފައިވާ ކަންކަމެވެ.

ވީމާ، ރަށުގެ ރީތިކަމާއި ރައްކާތެރިކަމަށްޓަކައި، ރަށުގެ އަތިރިމަތިން ކަށިވެލި ނެގުމާއި ފަޅުރަށްތަކުން ކަޅުވެލި ނެގުން މިހާރުން މިހާރަށް ހުއްޓާލުމަށް މި ކައުންސިލްގެ ފަރާތުން އެންމެހާ ލޮބުވެތި ރައްޔިތުންނަށް އިލްތިމާސްކުރަމެވެ.

ރަށުގެ ރައްކާތެރިކަމާއި ތިމާވެށި ޙިމާޔަތްކުރުމަށް މި ކައުންސިލުން ކުރާ މަސައްކަތްތަކުގައި، ރަށުގެ ލޮބުވެތި ރައްޔިތުންގެ ފަރާތުން އަބަދުވެސް ލިބެމުންދާ ފުރިހަމަ އެއްބާރުލުން މި ފުރުސަތުގައި ފާހަގަކޮށް، އެންމެހާ ލޮބުވެތި ރައްޔިތުންނަށް މި ކައުންސިލްގެ ފަރާތުން ނުހަނު އިޚްލާޞްތެރިކަމާއެކު ޝުކުރު ދަންނަވަމެވެ.