މޯލްޑިވްސް ފުޑް އެންޑް ޑްރަގް އޮތޯރިޓީ 

 ޞިއްޙީ ވުޒާރާ 

 މާލެ،   ދިވެހިރާއްޖެ

އިޢުލާން

ވިޔަފާރީގެ ގޮތުގައި ރާއްޖެއަށް ބޭސް އިމްޕޯރޓުކޮށް ވިއްކޭނީ ބޭހާއިބެހޭ ގަވާއިދު (ނަމްބަރ: 2014/R-46) ގައިވާ ގޮތުގެ މަތިން މިއޮތޯރިޓީގައި ބޭސް އިމްޕޯރޓުކުރާ އަދި ވިއްކާ ފަރާތެއްގެ ގޮތުގައި ރަޖިސްޓްރީވެ ހުއްދަ ލިބިގެންނެވެ.

ހަމައެހެންމެ، ބޭސް ވިއްކާ ފާރމަސީތައް މިއޮތޯރިޓީގައި ރަޖިސްޓަރީ ކުރުމުގެ އިތުރުން، ފާރމަސީ ޕްރޮފެޝަނަލުންނަށް ފާރމަސީތަކުގައި މަސައްކަތް ކުރެވޭނީ މިއޮތޯރިޓީން ހުއްދަ ލިބިގެންނެވެ. މިގޮތުން، ފާރމަސީތަކުގައި މިއޮތޯރިޓީން ދޫކުރާ "ބޭސް ވިއްކުމުގެ ހުއްދަ" ނެތި  ބޭސް ވިއްކުމަކީ މަނާކަމެއްކަމާއި، ފާރމަސީ ޕްރޮފެޝަނަލުން، ފާރމަސީ ތަކުގައި މަސައްކަތް ކުރާއިރު ފާރމަސިސްޓް އައިޑީ ކާޑު ނެތި މަސައްކަތް ކުރުމަކީ މަނާ ކަމެކެވެ.

ފާރމަސީ ތަކުން ބޭސް ބައްލަވައިގަންނަވާ އިރު ތިރީގައިވާ ކަންކަމަށް ބެއްލެވުމަކީ ކޮންމެ ފަރުދެއްގެވެސް ސަލާމަތާއި ރައްކާތެރިކަމާއި ގުޅިފައިވާ ކަންކަމަށްވާތީ މިފަދަ ކަންކަމުގައި އަމިއްލަ ފުޅަށް ޒިންމާ ނެންގެމަށް ދެންނެވީމެވެ.           

-          ފާރމަސީ އަކީ ބޭސް ވިއްކުމުގެ ހުއްދަ އޮތް ފާރމަސީ އެއްކަން ކަށަވަރު ކުރުމަށް ޓަކައި، ބޭސް ވިއްކުމުގެ ހުއްދަ ފާރމަސިގައި ހަރުކޮށްފައިވޭތޯ ބެލުން.

-          ބޭސް ދޫކުރަން ހުރީ އެކަމުގެ ހުއްދަ އޮތް ފަރާތެއް ކަން ކަށަވަރު ކުރުމަށް ޓަކައި،  ބޭސް ވިއްކުމަށް މިއޯރިޓީއިން ދޫކޮށްފައިވާ ފާރމަސިސްޓެއް ކަން އަންގައިދޭ އައިޑީ ކާރޑް އަޅާފައި  ހުރިތޯ ބެލުން.

-          ނެންގެވި ބޭހަކީ މުއްދަތު ހަމަނުވާ ބޭސް ކަމުގައި ކަށަވަރު ކުރުމަށް ޓަކައި ބޭހުގައި ބަޔާން ކޮށްފައިވާ މުއްދަތު ހަމަވާ ތާރީޚު ބެލުން.

-          ބޭސް ބޭނުން ކުރަންވީގޮތުގެ އިރުޝާދު  ރަނގަޅަށް ކިޔައިދީ ސާފުކޮށް ލިޔެފައިވޭތޯ ބެލުން.

-          ބޭސް ޕެކްކޮށްފައި ހުރީ ރައްކާތެރި ގޮތަކަށްތޯ ބެލުން (މިސާލަކަށް ފިނީގައި ބަހައްޓަން ޖެހޭ ބޭސް ދޫކުރާ އިރު އައިސް ޕެކް ފަދަ ތަކެތި އަޅައި ޕެކް ކޮށްފައިވެތޯ ބެލުން). ފަދަ ކަންކަން ހިމެނެއެވެ.

ވީމާ، ބޭސް ވިއްކުމުގެ ހުއްދަ ނެތް ފާރމަސީ ތަކާއި، ބޭސް ވިއްކުމުގެ ހުއްދަ އޮތް ފާރމަސީ ޕްރޮފެޝަނަލުން ނެތި ހިންގާ ފާރމަސީ ތަކާއި މެދު މި އޮތޯރިޓީގެ ފަރާތުން ފިޔަވަޅު އަޅަމުން ގެންދާނެ ކަމުގައި ދެންނެވީމެވެ.

އަދި މިކަމާއި ގުޅޭ އިތުރު މައުލޫމާތު ބޭނުންވާނަމަ މިއޮތޯރިޓީގެ ހޮޓްލައިން ނަންބަރ: 7200321 އަށް ގުޅުއްވުން އެދެމެވެ.