ދިވެހިސަރުކާރުގެ ގެޒެޓަކީ، ރައީސުލްޖުމްހޫރިއްޔާ ތަޞްދީޤުކުރައްވާ ޤާނޫނުތަކާއި، ސަރުކާރުގެ އޮފީސްތަކުން ނެރުއްވާ އިޢުލާންތަކާއި ދެންނެވުންތަކާއި ނޫސްބަޔާންތައް އެއްނޫހަކުން ފެންނަށް އޮތުމުން ޢާންމުންނަށް ފަސޭހަވާނެވާނެތީ، އެ މަގުސަދުގައި ނެރެވޭ ނޫހެކެވެ.

ގެޒެޓުގައި ޝާއިޢުކުރުމަށް ހަމަޖެހިފައިވަނީ، ޤާނޫނުތަކާއި، ގަވާއިދުތަކާއި، ސަރުކާރުގެ އޮފީސްތަކުން ނެރުއްވާ އިޢުލާންތަކާއި، ދެންނެވުންތަކާއި، ނޫސްބަޔާންފަދަ ލިޔުންތަކެވެ.

ދިވެހިސަރުކާރުގެ ގެޒެޓް ނުކުންނާނީ، ކޮންމެ ހަފުތާއެއްގެ ހޯމަ ދުވަހާއި ބުރާސްފަތި ދުވަހުއެވެ. ހޯމަ ދުވަހުގެ ގެޒެޓުގައި ޝާއިޢުކުރައްވަން ބޭނުންފުޅުވާ ލިޔުންތައް ފޮނުއްވުމުގެ އެންމެފަހު ވަގުތަކީ، ކުރީ ހަފުތާގެ ބުރާސްފަތި ދުވަހުގެ މެންދުރު 12:00 ގެ ކުރިންނެވެ. އަދި ބުރާސްފަތި ދުވަހުގެ ގެޒެޓުގައި ޝާއިޢުކުރައްވަން ބޭނުންފުޅުވާ ލިޔުންތައް ފޮނުއްވުމުގެ އެންމެފަހު ވަގުތަކީ، ހިނގަމުންދާ ހަފުތާގެ އަންގާރަ ދުވަހުގެ މެންދުރު 12:00 ގެ ކުރިންނެވެ. ލިޔުންތައް ފޮނުއްވާނީ ގެޒެޓުގެ އީ.މެއިލް އެޑްރެހަށެވެ. ގެޒެޓުގައި ޝާއިޢުކުރެއްވުމަށް ފޮނުއްވާ ދިވެހި ލިޔުންތައް ލިޔުއްވާނީ މައިކްރޯސޮފްޓް ވާރޑުގައި ފަރުމާ ފޮންޓުންނެވެ.